2 Samuel 4
Ish-Bosheth Kithat
1Saul tapa Ish-Bosheth in Hebron a Abner sihna a zak ciangin a lungneu a, Israel khempeuh a patau uh hi. 2Tu-in Saul tapa in galkapte makai mi nih a nei hi. Khatpa min Baanah hi-a a khatpa min Recab ahi hi; amaute Beeroth mi Rimmon’ tapate hi uh a, Benjamin’ beh pan ahi uh hi - Beeroth pen Benjamin khenkhatin kisim hi, 3bang hang hiam cih leh Beeroth mite Gittaim ah tai uh a, tuni dongin pemta in a teng uh hi. a 4 (Saul tapa Jonathan in tapa khat nei-a a khe langnih in a bai hi. Jezreel pana Saul le Jonathan thu a kizak in amah kum nga a pha hi. Amah a cingnu in manin taipih a nawhtat lua ahi manin amah kiatsuah-a tua hanga bai ahi hi. Ama min Mephibosheth ahi hi.) 5 Tu-in Ish-Bosheth inn a hawh dingin Beeroth Rimmon’ tapate Recab le Baanah kuankhia uh a, sun nisat laitaka sun khawl hunin tualai a tung uh hi. 6Amaute mangbuh la ding kineihin inn sungtawng ah lut uh a, a gilpi ah a dawt uh hi. Tua ciangin Recab le a sanggampa Baanah a gelsim uh hi. 7 Amah a lupna inndei sungah a lup laitakin amaute inn sungah a lut uh hi. Amaute in amah dawtin a thah khit uh ciangin a lu a tankhia uh hi. Amaute in a lu la uh a Arabah lam tawnin zan khuavakin a pai uh hi. 8Amaute in Ish-Bosheth lutang Hebron a om David puak uh a, kumpipa kiangah, “Hih lai-ah nang thah hong sawm na galpa, Saul’ tapa Ish-Bosheth lutang a om hi. Tuni-in TOPA in Saul le ama suante tungah ka topa kumpipa phu a la khin hi,” a ci uh hi. b 9 David in Beeroth mi Rimmon’ tapate Recab le a sanggampa Baanah kiangah, “Ka lungkhamna khempeuh pana hong hukhia TOPA nuntakna lo a kong geninah, 10mi khat in thu hoih hong puak bangin, ‘Saul si ta hi,’ ci-a hong gen ciangin amah manin Ziklag ah ka that hi. Tua in ama hong puak thuthak pahtakmana ka piak ahi hi. 11Migilote in a mawhpeng mi khat a inn sunga a lupna tungah that ahileh - ama sisan no tungah hong siikin leitang pan hong nak mansakzaw ngel lo ding ka hi hiam!” ci-in a dawng hi. c 12 Tua ciangin David in a mite tungah thu pia a, amaute a that uh hi. Amaute in a khutte uh le a khete uh attanin a luangte Hebron a bual kiangah a khai uh hi. Ahi hangin Ish-Bosheth’ lutang la uh a, Hebron a Abner’ hanah a vui uh hi. d
Copyright information for
ZomZIV